ዜና አለም አቀፍ

ጊኒ ቢሳው ስኬታማ ወታደራዊ መፈንቅለ መንግስት ተካሄደ

on | 2025-11-27 12:19:03

Share: Facebook | Twitter | Whatsapp | Linkedin

አዲስ አበባ - ጊኒ ቢሳው ውስጥ የሚገኙ ወታደራዊ አመራሮች ወታደራዊ መፈንቅለ መንግስት በመፈፀም የሃገሪቱን ፕሬዚዳንት ኡማሮ ሲሶኮን አስረዋል።

ወታደራዊ አመራሮቹ በሃገሪቱ ብሔራዊ ጣቢያም ቀርበው እሁድ የተካሄደውን ፕሬዚዳንታዊ ምርጫ ማገዳቸውን ገልፀዋል።

በተጨማሪ ሁሉንም የጊኒ ቢሳው ድንበሮች የዘጉ ሲሆን የሰዓት እላፊም አስቀምጠዋል።

ጊኒ ቢሳው ባለፈው እሁድ ፕሬዚዳንታዊ ምርጫዋን ያካሄደች ሲሆን ውጤቱ በዛሬው እለት ይፋ ይደረጋል ተብሎ እየተጠበቀ ነበር።

ከመፈንቅለ መንግስቱ በኋላ ከፕሬዚዳንቱ በተጨማሪ የፕሬዚዳንቱ የምርጫ ተፎካካሪ የነበሩት ዲያዝ እና ለእርሳቸው ድጋፍ ሲሰጡ የነበሩት የቀድሞ የሃገሪቱ ጠቅላይ ሚኒስተር ፔሬራም ታስረዋል።

ወታደሮቹ የጦሩን አዛዥ ጀነራል ና ንታንና ምክትላቸውን ጀነራል ቱሬንም ማሰራቸው ተሰምቷል።

ጊኒ ቢሳው ከቅኝ ግዛት ነፃ ከወጣች በኋላ ባለፉት 50 አመታት 9 የመፈንቅለ መንግስት ተግባራትንና ሙከራዎችን አስተናግዳለች።

የ2 ሚሊየን ሰዎች መኖሪያዋ ሃገር ሰፊ የባህር ዳርቻ ሲኖራት ለአደንዛዥ እፅ ዝውውር የተመቸች ስትሆን ተመድም "narco-state" የሚለውን ስያሜ ሰጥቷታል።

መፈንቅለ መንግስት ፈፃሚዎቹም መፈንቅለ መንግስቱን የፈፀሙት በእፅ አዘዋዋሪዎች የሚደገፉ ፖለቲከኞችን ሴራ ለመቀልበስ እንደሆነ ገልፀዋል::