ዜና የሀገር ውስጥ

“በየትኛውም የክፍል ደረጃ 50 በመቶና በላይ አማካይ ውጤት ያላመጣ ተማሪ ወደ ቀጣዩ ክፍል ወይም እርከን አይዛወርም።“ - ትምህርት ሚኒስቴር

on | 2025-09-25 10:32:10 on2025-11-30 22:57:59

Share: Facebook | Twitter | Whatsapp | Linkedin

---

የትምህርት ምዘናና ፈተና አስተዳደር ስርዓቱን ለማስተካከል የተወሰዱ እርምጃዎችና እየተሠሩ ያሉ ስራዎችን በተመለከተ ትምህርት ሚኒስቴር ባወጣው መግለጫ፣ የ12ኛ ክፍል ማጠናቀቂያ ፈተና የወሰዱ ተማሪዎች እንዲሁም በየትኛውም የትምህርት ደረጃ ያሉ ተማሪዎች 50 በመቶና በላይ አማካይ ውጤት ሲያመጡ ወደ ሚቀጥለው ክፍል/እርከን እንዲሸጋገሩ እየተደረገ እንደሚገኝ አስታውሷል።

በአዲሱ የትምህርት ፖሊሲ መሰረት የ6ኛ እና የ8ኛ ክፍል ክልል አቀፍ ፈተና እንዲሰጥ የተደረገ ሲሆን በሁሉም ክልልና ከተማ አስተዳደሮች በነዚህ ፈተናዎች 50 በመቶና በላይ አማካይ ውጤት ያመጡ ተማሪዎች ወደ ቀጣዩ ክፍል እንዲዛወሩ እየተደረገ ይገኛል፡፡  ይህም በየደረጃው የትምህርት ጥራቱ ያለበትን ደረጃ እየለኩ ለመሄድ ትልቅ አስተዋጽኦ ይኖረዋል ብሏል።

ባለፉት አራት ዓመታት የ12ኛ ክፍል ማጠናቀቂያ ሀገር አቀፍ ፈተና ተፈታኞች 50 ከመቶና በላይ አማካይ ውጤት ያመጡ ወደ ዩኒቨርሲቲ በቀጥታ እንዲገቡ እየተደረገ ሲሆን፤ የተወሰነ ድጋፍ ተደርጎላቸው ውጤት ማምጣት ለሚችሉ ተማሪዎች አዲስ የሪሚዲያል ፕሮግራም ተቀርጾ ተማሪዎች ለአንድ ዓመት በዩኒቨርሲቲዎች ውስጥ ተጨማሪ ድጋፍ እንዲያገኙ በማድርግ በቀጣዩ ዓመት ወደ ዩኒቨርሲቲ እንዲገቡ በማድረግ በርካታ ቁጥር ያላቸው ተማሪዎች የዩኒቨርሲቲ ትምህርታቸውን እየተከታተሉ እንደሚገኙ ተገልጿል። 

ይህ አካሄድ በሂደት 50 በመቶና በላይ አማካይ ውጤት የሚያመጡ ተማሪዎች ቁጥር እየጨመረ ሲሄድ በሪሚድያል የሚገባው ተማሪ ቁጥር እየቀነሰ ሄዶ ፕሮግራሙ የሚጠፋበት ሁኔታ ይፈጠራል ሲል ሚኒስቴሩ አስረድቷል። 

ሌላው በፈተና አስተዳደር ሥርዓቱ የተወሰደው እርምጃ የፈተና ኩረጃና ስርቆትን በማስቀረት ፈተናውን መስጠት መቻሉ እንደሆነ ሚኒስቴሩ ጠቅሷል፡፡

የትምህርት ጥራትን ከታች ጀምሮ ለማረጋገጥ አዲስ ሥርዓተ ትምህርት ተቀርጾ ወደ ትግበራ ተገብቷል  ያለው ሚኒስቴሩ፤ ለመጀመሪያ ጊዜ የአጠቃላይ ትምህርት አዋጅ ጸድቆ ወደ ተግባር እንዲገባ መደረጉንም ተገልጿል።