ዜና የሀገር ውስጥ

የኢትዮጵያ ንግድ ባንክ የሠራተኞቹን የመኖሪያ ቤት ችግር ለመፍታት ከአዲስ አበበ ከተማ አስተዳደ 1 ሺህ 125 የጋራ መኖሪያ ቤቶች በግዥ መረከቡን አስታወቀ ።

on | 2025-11-23 09:33:37

Share: Facebook | Twitter | Whatsapp | Linkedin

---

ከአዲስ አበበ ከተማ አስተዳደር የተገዙት እነዚህ ዘመናዊ መኖሪያ ቤቶች በጀርመን፣ ግራር እና አየር ጤና ሳይት ሲሆን ባንኩ እና ከተማ አስተዳደሩ ቤቶቹን መርቀው የቁልፍ ርክክብ ሥነ ሥርዓት በዛሬው ዕለት  አከናውነዋል። 

በርክክብ ሥነስርዓቱ ላይ የተገኙት የአዲስ አበባ ከተማ ከንቲባ ክብርት ወ/ሮ አዳነች አቤቤ እንደተናገሩት "የአዲስ አበባ ከተማ አስተዳደር በዚህ ወቅት የማህበረሰባችንን ማህበራዊና ኢኮኖሚያዊ ጥያቄዎች ለመመለስ የሚያስችሉ በርካታ ውጤታማ ስራዎችን እያከናወነ ነው" ብለዋል። ቤቶቹን በተመጣጣኝ ዋጋ ለኢትዮጵያ ንግድ ባንክ ሠራተኞች መተላለፋቸውን ከንቲባዋ አስረድተዋል። 

የኢትዮጵያ ንግድ ባንክ ፕሬዚዳንት ተወካይና የኮርፖሬት አገልግሎቶች ኤክስኪዩቲቭ ምክትል ፕሬዚዳንት አቶ ኤፍሬም መኩሪያ በበኩላቸው  የኢትዮጵያ ንግድ ባንክ ሁልጊዜ ለሠራተኞቹ ጠቃሚ ለሆኑ ጉዳዮች ቅድሚያ እንደሚሰጥ ገለፀው የዚህ ትልቅ ዕድል ተጠቃሚ ለሆኑት የባንካችን ሠራተኞች እንኳን ደስ አላችሁ ብለዋል።

የኢትዮጵያ ንግድ ባንክ ሰራተኞች ጥሩ ስራ በመስራት የደንበኞችን እርካታ ማረጋገጥ እንዲችሉ ምቹ የመኖሪያ አካባቢን እንዲያገኙ የሚያስችል መሆኑን ያስረዱት አቶ ኤፍሬም የሠራተኞች ተነሳሽነትና ትጋት የሚጨምር እንደሚሆን ያላቸውን እምነት ገልፀዋል።

የኢትዮጵያ የንግድ ባንክ የሠራተኞች ማህበር ፕሬዚዳንት አቶ አበራ ጌታቸው በበኩላቸው  ባንኩ የሠራተኞቻችንን ለረጅም ጊዜ የቆየ ጥያቄ ለመመለስ የወሰደው እርምጃ ታሪካዊና የሚመሰገን ነው ብለዋል። ሠራተኞቹ ለደንበኞቻቸው ቅድሚያ መስጠት እና ባንኩ እንዳስደሰታቸው ሁሉ እነሱም የደንበኞች እርካታ ለመጨመር በአገልጋይነት ስሜት እንዲሰሩ ጥሪ አቅርበዋል። 

የኢትዮጵያ ንግድ ባንክ ከከተማ አስተዳድሩ የተረከባቸው የጋራ መኖሪያ ቤቶች በአዲስ አበበ ከተማ መኖርያ ቤት ለሌላቸው ሠራተኞቹ በዕጣ እንደሚተላለፉ አስታውቋል።

ይህም የሠራተኞቹን የሥራ ላይ ተነሳሽነትን በመጨመር ባንኩን የበለጠ ትርፋማ ያደርገዋል   ተብሏል።

 የጋራ መኖሪያ ቤቶቹ በዘጠኝ ወራት ውስጥ በፍጥነትና በጥራት በ24 ህንፃዎች የተገነቡ መሆናቸውን በምረቃ ሥነ-ሥርዓቱ ወቅት ተገልጿል።