ዜና የሀገር ውስጥ

ኢትዮጵያ ከውጭ ሀገራት ወደ ኢትዮጵያ ከሚላክ ገንዘብ (ሬሚታንስ) 7 ነጥብ 2 ቢሊየን የአሜሪካን ዶላር ማግኘቷ ተነገረ

on | 2025-10-04 06:41:24 on2025-11-30 22:58:25

Share: Facebook | Twitter | Whatsapp | Linkedin

---

ኢትዮጵያ ከውጭ ሀገራት ወደ ኢትዮጵያ ከሚላክ ገንዘብ (ሬሚታንስ) 7 ነጥብ 2 ቢሊየን የአሜሪካን ዶላር ማግኘቷን ጠቁመው ይህም 22 በመቶ ብቻ እንደሆነ የኢትዮጵያ ንግድ ባንክ ፕሬዝዳንት አቶ አቤ ሳኖ ገለፁ።

ኢትዮጵያ በሬሚታንስ ዘርፍ አቅሟን አሟጣ መጠቀም ከቻለች ዳያስፖራው በሕጋዊ መንገድ ወደ ሀገር ቤት ከሚልከው ገንዘብ በዓመት ከ35 ቢሊዮን ዶላር በላይ ማግኘት እንደሚያስችላት አቶ አቤ ሳኖ ተናግረዋል።

አቶ አቤ ሳኖ በደቡብ አፍሪካ ፕሪቶሪያ ከተማ ከሚገኙ ኢትዮጵያውያን እና ትውልደ ኢትዮጵያውያን ጋር ተወያይተዋል።

የኢትዮጵያ ንግድ ባንክ ፕሬዝዳንት አቶ አቤ ሳኖ እንዳሉት ኢትዮጵያውያን እና ትውልደ ኢትዮጵያውያን አንድነታቸውን በማጠናከር በሀገራቸው ኢንቨስት የሚያደርጉበት ጊዜ አሁን ነው ብለዋል::

ሌላው 78 በመቶው ወደ ሀገር ውስጥ እየገባ እንዳልሆነና ይህ መግባት ቢችል ከ35 ቢሊዮን ዶላር በላይ ከሬሚታንስ እንደሚገኝ አብራርተው ዳያስፖራው በሬሚታንስ፣ በኢንቨስትመንትና በሌሎች ዘርፎች እያደረጉ ያለውን አስተዋጽኦ ይበልጥ እንዲያጠናክሩ የኢትዮጵያ ንግድ ባንክ ከጎናቸው ሆኖ አስፈላጊውን ድጋፍ እንደሚያደርግ አስታውቀዋል።

የኢትዮጵያ ንግድ ባንክ ከጀመራቸው ሰፊ የለውጥ ስራዎች መካከል የዳያስፖራውን ማህበረሰብ ተጠቃሚ የሚያደርጉ ስራዎች እንደሚገኙበት ጠቅሰው በዚህም በ2018 ዓ.ም ለዳያስፖራው ማህበረሰብ 50 ቢሊዮን ብር ለማበደር ዝግጅት መደረጉን አስታውሰዋል።

በደቡብ አፍሪካ የኢ.ፌ.ዲ.ሪ. ልዩ መልዕክተኛና ባለሙሉ ስልጣን አምባሳደር ደሊል ከድር በበኩላቸው የኢትዮጵያ ንግድ ባንክ አንጋፋ የፋይናንስ ተቋም መሆኑን አመልክተው፣ የባንኩ ፕሬዝዳንት ከሀገር ውጪ የጀመሩትን የዳያስፖራ ሬሚታንስ ንቅናቄ ለመደገፍ ከጎናቸው እንደሚቆሙ ተናግረዋል።

የንግዱ ማህበረሰብ እና የተለያዩ አደረጃጀቶችም በሚደረጉት ውይይቶች ላይ በንቃት እንዲሳተፉ አምባሳደር ደሊል ጥሪ አቅርበዋል፡፡

በደቡብ አፍሪካ የተባበሩት የኢትዮጵያ ኮሚኒቲ ምክትል ፕሬዚዳንት አቶ ናወዊ ሙሳ፤ የኢትዮጵያ ንግድ ባንክ የኢትዮጵያውያንና ትውልደ ኢትየጵያውያንን ተጠቃሚነት ለማረጋገጥ እያደረገ ላለው ጥረት አመስግነው ዕቅዱን ለመተግበር ጠንክረው እንደሚሰሩ አስረድተዋል።