ስፖርት አለም አቀፍ

በቶኪዮ የወርቅ መርገም አልሰበር ያላት ኢትዮጲያ

on | 2025-09-23 10:58:20 on2025-11-30 22:57:57

Share: Facebook | Twitter | Whatsapp | Linkedin

---

ኢትዮጲያ በአለም አትሌቲክስ ሻምፒዮና 1993 ከዛሬ 32አመት በፊት በዉድልጇ ሀይሌ ገብረ ስላሴ አማካኝነት በሀገረ ጀርመን ስቱት ጋርት በተደረገ የአለም አትሌቲክስ ሻምፒዮና ነበር የወርቅ ካዝናዋን አሁዱ ብላ የከፈተችዉ።

በጀግናዉ አትሌት ሀይሌ ገብረስላሴ ፈር ቀዳጅነት የተጀመረዉ ወርቅ የማጥለቅ ጉዞ ካዛ በመለስ በተደረጉ የአለም አትሌቲክስ ሻምፒዮና መድረኮች ሁሉ በትዉልድ ቅበብሎሽ ደምቃ ዉድ ልጆቻም ሰንደቋን ከፍ በማድረግ በወርቅ አስጊጠዉ በአለም አደባባይ ቀና እንድትል አድርገዋታል።

ኢትዮጲያ በአለም አትሌቲክስ ሻምፒዮና ታሪክ ወርቅ ሳታገኝ የተመለሰችዉ ከዛሬ 34 አመት በፊት 1991 በጃፖን ቶኪዮ ነበር እነሆ ዛሬም ከሶስት አስርት አመታት በኋላ ታሪክ ራሱን ደግሞ ለሁለተኛ ጊዜ በዘንድሮዉ የአለም አትሌቲክስ ሻምፒዮና ያለ አንድም ወርቅ በዜሮ ዉድድሯን ደምድማለች።

ትናንት በቁርጥ ቀን ልጆቿ ላብ በአለም አደባባይ ከፍ ብሎ የተዉለበለበዉ ባንድራዋ እና ከፊት የቀደመዉ ስሟ በዘንድሮዉ የአለም ሻምፒዮና ከልምዷ ርቃ ዝና እና ክብሯ ደብዝዟል።

በተለይም ደግሞ በ10000 እና 5000 ሜትር ባሉት ርቀቶች ኢትዮጲያ ደጋግማ የደመቀችባቸዉ እና ከአለም ህዝብ ጋር በስፋት የተዋወቀችባቸዉ መለያ እና መታወቂያዋ የሆነ ርቀትም ጭምር ነዉ።

በዘንድሮዉ የአለም አትሌቲክስ ሻምፒዮና ላይ ግን ይህ መለያዋ የሆነዉ ርቀት ከኢትዮጲያ ጋር ቃልኪዳኑን ያነሳ  ይመስላል ።ምክንያቱም ደግሞ ከረጂም ጊዜ በኋላ  በሁለቱም ፆታዎች የተለመደዉ የወርቅ ሜዳሊያ ሊገኝ አልቻለም።

ኢትዮጲያ በዘንድሮዉ የአለም አትሌቲክስ ሻምፒዮና ባደረገቻቻዉ 8 የፍፃሜ ዉድድሮች ሁለት የብር እና ሁለት የነሀስ በድምሩ አራት ሜዳሊያዎችን ብቻ ሰብስባ ከአለም 22ኛ ደረጃን ይዛ በማጠናቀቅ  ከምንጊዜዉ የአለም አትሌቲክስ ሻምፒዮና  ተሳትፎ እጅግ ደካማ የዉድድር ጊዜን በማሳለፍ ከዳማቅ ታሪኳ ጎን ለጎን ደብዛዛዉን የአለም ሻምፒዮና ታሪኳን በቶኪዮ ሰማይ ስር ፅፋ አልፋለች።

ባለፉት አመታት የኛ ተፎካካሪ የነበረችዉ ጎረቤት ሀገር ኬኒያ ከዚህ በፊት የምትታወቅበትን ርቀት አጎልብታ በማትታወቅበት አበክራ ሰርታ በወርቅ ደምቃ በ7ወርቅ ፣በ2ብር እና 2ነሀስ በድምሩ 11 ሜዳሊያዎችን ሰብስባ ከአለም ሁለተኛ ደረጃን ይዛ በማጠናቀቅ  በእጅጉ ስኬታማ የሆነዉን የአለም አትሌቲክስ ሻምፒዮና አሳልፋለች ።

ለሁሉም የኢትዮጲያ አትሌቲክስ በእጅጉ መታመሙን  በአለም አደባባይ ለወዳጅም ለጠላትም  በቶኪዮ ገልጦ በማሳየት ለያዘዉ ደዌ ፈዉስ ይገኝለት ዘንድ ሌጆቹን ተማፅኗል። (በአንተነህ ታረቀ)